Шымкентте автосалондардың бірі тұтынушыға 2016 жылғы көлікті 2019 жылғы деп алдап сатқан. Бар шындық азаматша сатып алған автосын бір айдан соң, қайта сатуға қойғанда, вин-код арқылы тексеріліп, ашылыпты. Бұл туралы Шымкент қаласы бойынша сауда және тұтынушылардың құқығын қорғау департаментінің өкілдері хабарлап отыр.
Шаһардағы көлік сататын салондар заңды белшесінен басып жүр. Бірі көліктің параметрлерін қате көрсетіп, ендібірі тіпті шыққан жылын жасырып, жүрілген шақырымды азайтатын алаяқтыққа баратын көрінеді. Оның бәрі Шымкент қалалық тұтынушылардың құқығын қорғау департаменті тарапынан жоспардан тыс тексеру жұмыстары жүргізілген. Әкімшілік құқық бұзушылық бойынша ескерту беріліп, айыппұл салынған.
«Шымкент қаласындағы әуе компаниясының атына да тұтынушылардан арыз-шағым жиі түседі. Кәсіпкерлер тұтынушылық дауға немқұрайлы қарап, үнемі ескертулерді назарға ілмей келген. Нақтырағы, халық жүктеріндегі тауарлардың сыну, бүлінуі секілді шағымдарға бей-жай қарап, өтеп беруден бас тартып отырған. Сонымен қатар, билеттерді кері қайтаруда да мәселелер жетерлік» — дейді департамент директоры орынбасарының міндетін атқарушы Бақытжан Салхожаев.
ҚР Сауда және интеграция министрлігі Тұтынушылар құқығын қорғау комитеті Шымкент қалалық департаментіне 2022 жылы келіп түскен шағым 2021 жылмен салыстырғанда 245 %-ға артыпты. Былтыр 35 миллион теңгеге жуық қаржыны қайтарған болса, биыл бұл сома – 66 миллионға жетіп отыр. Департамент мамандарының мәлімдеуінше, бұл құқықтық сауаттың артуының, халықтың бей-жай қарамауының нәтижесі.
Шымкент қаласы бойынша сауда және тұтынушылар құқығын қорғау департаментінің баспасөз қызметі
