Бүгінде сырқаттанып жатқан науқастардың біршамасы үйлерінде ем қабылдап жатқаны белгілі. Осы ретте аудан басшысы Ұ.Сәдібековтің тапсырмасына сәйкес, Сайрам ауданында 29 жеңіл көлік пен жүргізуші бөлініп, әрбір елді мекенге жауапты дәрігермен бірге науқастардың үйін жеке-жеке аралап ем домдарын жасауда.
Қазіргі таңда әр елді мекен бойынша сырқаттанып жатқан тұрғындардың тізімі жасақталып, аймақтық дәрігердің қатаң бақылауына алынған.
Ауданның барлық ауылдық округтерінде науқасқа дер кезінде көмек беру, аурудың алдын алу мақсатында қойылған кезекші жеңіл автокөліктердің көмегімен, үйінде жатып ем қабылдаушылардың үйлеріне уақтылы қызметтер көрсетіліп, ауыл тұрғындары медицина саласының қызметкерлері мен еріктілерге өз ризашылықтарын айтуда. Сондай-ақ Сайрамдық кәсіпкерлер 5 млн теңге көлемінде қаржы жинап, оның 3,5 млн теңгесіне 19 Бобров медициналық тыныс алу құрылғыларын сатып алған. Өкпе қабынуына, коронавирус індетіне шалдыққан науқастарға аса қажетті құрылғылар аудандық орталық ауруханаларға орнатылды.
