Жаңа ауыл ауылдық округіне қарасты елді мекендерде кәмелетке толмағандардың істері және олардың құқықтарын қорғау комиссиясының бастамасымен алқалы жиындар өткізілуде деп хабарлайды qaraqalamnews.com ақпараттық порталы.
Барлық санитарлық талаптар мен арақашықтықты сақтай отырып өткізілген жиынға Жаңа ауыл ауылдық округі әкімінің орынбасары Бақытжан Жақсылықов, ауыл биі Қантөре Қарабаев және округ әкімі аппаратының маманы Әбілхайыр Қосқұнтұлы қатысты.
Кәмелет жасқа толмаған балалар мен жасөспірімдер тарапынан жасалатын қылмыс пен құқық бұзушылықтардың алдын алу, жастарды еңбекке баулу, спортпен шұғылдану, бос уақыттарын тиімді пайдалана білуге дағдыландыру, спиртті ішімдіктер мен нашақорлық, темекіге тәуелділік секілді зиянды әдеттерден арылуға шақыру мақсатында өткен басқосуларда ұлтаралық татулықты нығайту, жаһандық covid19 пандемиясы кезіндегі карантиндік режимнің сақталуы да кеңінен сөз болды. Округтегі әрбір іске қоғамдық ұйымдардың өкілдері мен ерікті, белсенді жастарды көптеп тарту мәселелері айтылды.
Ұйымдастырушылардың айтуынша Жаңа ауыл, Атақоныс, Қарой елді мекендерінде өткен мұндай жиындар алдағы уақытта әр айда өткізіліп, атқарылған жұмыстардың есебі тыңдалады. Комиссияның 1 айлық жұмыс жоспарлары талқыланып, қолбайлау болып отырған мәселелер көпшіліктің кеңесімен шішілетін болады.
