Бүгін Яссы орталық мешітінде «Ақ жол» демократиялық партиясының Түркістан облыстық филиал өкілдерінің ұйымдастыруымен қайырымдылық іс-шара болып өтті. Аталмыш шара аясында әлеуметтік аз қамтылған отбасылар мен көп балалы аналарға 21 тонна көмір, 23 балаға қыстық киімдер мен 50 жанұяға азық-түліктер үлестірілді.
Сауапты істің бастамасы болған азаматтарға жиналған тұрғындар ыстық ықыластарын білдіріп, ақ тілектерін арнады. Игілікті шараға «Ақ жол» демократиялық партиясының депутаттары және қаланың бас имамы Мұхамеджан Ергешбайұлы сауап ниетімен атсалысқаны үшін қажетті көмек көрсетілген қала тұрғындарының алғысына бөленді.
Қазіргі таңда қолда бар мүмкіндікті садақа ниетімен пайдалана отырып, сауап алуды ниет етіп, қоғамға пайдалы іс жасау мүмкіндіктерімен көмек көрсеткен депутаттар алдағы уақытта да, игі істің жалғасын таба беретіндіктерін жеткізді. Асыл дініміздегі айтылған қағида бойынша садақа беру – қиямет күні әркім өз теріне малынатын аптап ыстықта иесіне сая болады делінген. Қолдан келгенше жақсылықтар жасалып, сауапқа толы істердің бастамасы молая берсін.
Түркістан қалалық мәслихатының баспасөз қызметі
