Шымкент қаласында экономика салаларын білікті мамандармен қамтамасыз ету, техникалық және кәсіптік білім беру бағытында кадрлар даярлауда іс-шаралар жоспары әзірленген. Қазіргі таңда қалада техникалық және кәсіптік білім беру мекемелерінде 34 961 студент білім алуда. Жалпы 10 сала, 75 мамандық, 166 біліктілік бойынша мамандар даярлау жолға қойылған.
«Білімді ұлт» ұлттық жоспарына сәйкес, шаһарда 2022-2023 оқу жылына 16 466 шәкіртті қабылдау жоспарланып отыр: мемлекеттік тапсырыс бойынша 11 704 орын (70 пайыз), ақылы негізде 4 762 (30 пайыз) орын. Мемлекеттік тапсырыс аясында қажетті мамандықтар бойынша 9 сынып (8193) және 11 сынып бітірушілері (3 511) тегін оқумен қамтылады. Мемлекеттік тапсырыс көлемі өткен жылдан 7 173 орынға артқан.
Қалалық білім басқармасының салааралық іс-шаралар жоспарына сәйкес, бұл бағытта кадрлар даярлауға сұранысты қалыптастыру, дуалды оқыту жүйесін дамыту, қысқа мерзімді оқыту, бітіруші түлектерді жұмысқа орналастыру іс-шаралары жүргізілуде.
2022 жылы үшжақты келісімшарт негізінде (әкімдік, колледж, кәсіпорын) 15 кәсіпорын 11 мемлекеттік колледжді қамқорлыққа алды. Шымкент қаласындағы 30 колледж жанынан Индустриялдық кеңестер және 28 қамқоршылық кеңес (11 мемлекеттік, 17 жекеменшік колледждерде) құрылды. 8 колледжде 2520 студент (11,3 пайыз) дуалды оқытумен қамтылған. Дуалды оқытумен қамтылған студенттер санын 2025 жылға қарай 42 %-ға жеткізу жоспарда.
2022 жылы бітіруші түлектерді жұмысқа орналастыру жоспары әзірленген. Жалпы 8468 бітіруші болса, оның ішінде жұмысқа орналасатыны – 7 197 (85 %), жоғары оқу орындарына түсетіні – 501 (5,9 %), әскерге кететіні – 162 (1,9 %).
Сонымен қатар, 11 колледж қысқа мерзімді оқытуды талапқа сай атқаруға дайын. Биыл сәуір-шілде айларында қала колледждері жұмыс берушілермен бірлесе 180 білім беру бағдарламаларын жасап, сараптамадан өткізеді.
Дуалды оқыту форматы бойынша 14 колледжде 5 900 студент қамтылады. Қосымша 58 кәсіпорынмен келісімшарт түзіледі. Бітірушілердің жұмысқа орналасу көрсеткішін кемінде 85 %-ға жеткізу көзделуде.
Жалпы айтқанда ірі кәсіпорындардың аса қажетті мамандықтарына талдау жасалып, өңірдегі білім беру ұйымдарының білікті кадрларын жаңа жұмыс орындарына ұсыну жұмыстарын ұйымдастыру, әлеуетті жұмыс берушілермен бірлесе «Бос орындар жәрмеңкесін» жүйелі түрде өткізу басты назарда тұр.
