Аталған пікірсайыс американдық парламенттік форматта өтті. Сөзжарыстың алғашқы кезеңінде 20 фракция қатысса, екінші кезеңіне 4 фракция ғана жолдама алды.
Оппозиция мен Үкімет мүшелері өз «кейстерін» дайындап, пікірлерін қорғауға тырысты. Талқыға түскен тақырып:
🔘 «ҚР-да саяси партиялар арасында бәсекелестікті арттырудың тиімді механизмін ұсынады»
🔘 «ҚР-да 3 тілділік құрдымға әкеледі деп есептейді».
Жас дебатерлар аталмыш тақырыпта өзіндік пікірлерін білдірумен қатар, көзқарастарын сенімді қорғады. Дәлелді фактілерді келтіре отырып, ой жүйріктігін көрсетті.
Үкімет бала туылғаннан бастап үштілді үйрену керек десе, қарсы тарап қажеттілік туындағанда ғана тіл үйренуге болатынын жақтап шықты. Тіл білудің дұрыс және бұрыс тұстарын да атап өтті.
«Осындай турнирлердің арқасында жастар сыни тұрғыдан ойлай алады. Қандай да бір мәселелерді шешуде креативті көзқарас дағдыларын дамыта алады. Пікірсайыс деген — дәлелді сөз саптауға баулиды, балаларды өз ой-пікірін нақты әрі тұжырымды жеткізе алуына көмек береді», — дейді «Ақ жол» партиясы Түркістан облыстық филиал төрағасының орынбасары Нұржан Есенбаев.
Дебат ойынының соңында әділ-қазылар топтардың жұмысын бағалап, тиісті марапаттарын тапсырды және қатысушылар арасынан үздік спикерді атады.
Пікір-сайыстың қорытындысы бойынша жүлделі ІІІ орынды Мадина Үсен мен Рақымжан Есбалта иемденсе, жүлделі ІІ орын Арман Бақтияр мен Алмас Баймұратқа бұйырды.
Ал, жүлделі І орын Жанна Серік пен Сағи Қанжігітке бұйырды.
“Үздік спикер” атағын Атабек Ағабек жеңіп алды.
