Сал ауруына шалдыққан балалар тың әдістермен емделуде

Шымкентте сал ауруына шалдыққан балалар тың әдістермен емделуде. Мамандар осындай диагнозы бар науқастарды кинестетикс, войта терапия, бобот терапия арқылы ауруларынан айықтыруда. №1 оңалту орталығында емделушілер күндізгі және тәуліктік стационарда ем-шаралар қабылдайды. Мекемеде қазір 110 бала емделіп жатыр. 110 бала ем алатын орталықта мамандар психологиялық, деффектологиялық ем шаралармен қоса түрлі ойын, еңбек терапияларын жүргізеді. Балалар мұнда бұлшық еттерін жақсартып, басын ұстауды, өздігінен отыруды, өзге де қимыл-қозғалыстарға үйренеді. Салаға жауаптылардың айтуына қарағанда, қазір қалада сал ауруына шалдыққан 1200 бала есепте тұр. Олармен жұмыс істейтін мамандар тың әдістерді меңгеріп тұрақты түрде біліктіліктерін арттырады. Айта кетейік, орталықта жыл басынан бері мамандар түрлі терапиялардың арқасында 14 баланы аяғынан нық тұрғызған. Жүруді үйренген 12 балаға тұсау кесер ұйымдастырылып, зейіні тұрақталған 27 балаға тілашары рәсімі өткізіліпті.