Шымкент қаласында жас ақындар арасында республикалық «Күміс қалам — 2022» байқауы ұйымдастырылды, деп хабарлайды saraptimes.kz. Қалалық ішкі саясат және жастар істері басқармасы «Жастар ресурстық орталығы»КММ-нің ұйымдастыруымен өткен байқауға еліміздің түкпір-түкпірінен талантты жас ақындар қатысты. Аталған байқаудың негізгі мақсаты – тәуелсіздік жылдарында жеткен жетістіктерді насихаттау, әдеби үрдісте дарынды жас ақындардың жарқырап көрінуіне жол ашу. Сондай-ақ жас таланттар мен оқырмандардың, әдебиеттегі аға буын мен жас толқынның ұрпақтар сабақтастығын жалғау, олардың ақындық қабілеттерін шыңдау. Мүшәйрада сөзден маржан терген ақындарға «Дарын» мемлекеттік жастар сыйлығының лауреаты Қалқаман Сарин, ҚР Еңбек сіңірген қайраткері Ханбибі Есенқарақызы, ҚР жазушылар одағының мүшесі Бақытжан Алдияр, «Қаратау» дәстүрлі өнер мектебінің ұстазы Абай Қалшабек, «Айтыс ақындары мен жыршы-термешілердің халықаралық одағының» мүшесі Бекмұрат Анарбаев қазылық етті. Байқауда ақындар сөзден маржан теріп, ел Тәуелсіздігінің жетістіктерін жырларына арқау етті. Қазылар алқасының шешімімен «Күміс қалам» атты поэтикалық дуэльдің бас жүлдесіне Шымкент қаласының жас ақыны Арайлым Мұраталиева ие болды. Күмістен жасалған қаламды жеңімпазға қазақтың белгілі ақыны Қалқаман Сарин табыстады. І орын «Есенғали Раушан» атындағы арнайы жүлде — қостанайлық Дәулет Жадырасынға бұйырды. ІІ орынды «Әбілда Аймақ» атындағы арнайы жүлде — Бейбітбек Ақбота (Шымкент қаласы), ІІІ орынды «Тынышбай Рахым» атындағы арнайы жүлде — Оралбай Аружан (Жезқазған қаласы) ие болды. «Жәркент Бөдеш» атындағы арнайы жүлде — Мерсадықов Алтынбек (Орал қаласы). «Аманхан Әлім» атындағы арнайы жүлдеге — Тұрғанбек Нұртас лайық деп танылды. Айта кетейік, 2021 жылы өткен республикалық «Күміс қалам» поэзиялық кешінде Ақтөбе облысынан келген Ершат Қайболдин әдеби байқаудың бас жүлдесі «Күміс қалам» иегері атанған еді.
