ТҮРКІСТАН ОБЛЫСЫ: МАҢЫЗДЫ МАҚСАТ — ИННОВАЦИЯЛЫҚ ДАМУ

Жер қойнауына Менделеев кесте­сін­де келтірілген қазба байлығының бәрін дер­лік жинаған ұлы даланың төл иесі Қазақ­стан үшін индустриялық державаға айна­луды тағдырдың өзі жазған сияқты.  Еліміз баламасыз бастамаларымен жаһандық дағдарыстан өзгелермен салыстырғанда оқ бойы озық шыққан Қазақстан ел экономикасын жаңа асуларға шығару мақсатында батыл бастама  – 2020 жылға дейінгі үдемелі ин­дустриялық-инновациялық даму бағ­дар­ламасын қабылдады. Мемлекет басшысының тап­сыр­масына сәйкес ел Үкіметі осы үде­мелі индустрия­лық-инновациялық даму­дың (ҮИИД) мемлекеттік бағдарламасын іс жүзіне асыру мақсатындағы шаралар шеңберінде Қазақстанның индустрия­ландыру карта­сын бекітті. Бұл картада алдағы уақытта іске қосылатын индус­триялық жобалар­дың нақты кестесі белгіленген. Бұл жобаларды іс жүзіне асыру шараларына еліміздің кәсіпкер­лерін кеңінен қамту мақсатында “Биз­нестің жол картасы-2020” бағдарла­масы қабылданды. Тек осы бағдарла­маны жүзеге асыру үшін ғана үстіміздегі жылы 30 миллиард теңге қаржы бөлінбек. “Индустрияландыру картасы” екі бө­лімнен тұрады. Біріншісі, өңірлік кар­талар. Онда облыстарды дамытуға бірінші кезекте қажетті нысандар шоғыр­­ланды­рылған. Екінші республи­калық карта. Мұнда орталық атқарушы ор­гандар мен мемлекеттік хол­дингтер тікелей бақылауға алған индустриялық-инновациялық даму жоспарының негізгі нысандары топтасты­рылған. “Индустрия­ландыру картасына” енгізу үшін алдын-ала 385 жоба ұсыныл­ған болатын. Жан-жақты талқылаулар бары­сында 236 жоба іріктелініп, “Индус­трияландыру картасына” кіргізілді. Атап айтқанда, жалпы құны 6,8 триллион теңге болатын 101 ірі жоба республикалық картаға, жалпы құны 580 миллиард теңге болатын 139 жоба өңірлік карталар­ға топтастырылды.