Қолда бар ресурстарды қолдана отырып, медициналық қызмет көрсетуде оң нәтижелерге жету үшін ұйымдастыру, әлеуметтік және этикалық мәселелерді назарға ала отырып, аса нәтижелі технологияларды енгізуді қолдау керек. Соңғы кезде медицина мен денсаулық сақтау тарихында сенімді ақтамаған немесе тіпті зиян келтірген технологиялардың көптеген мысалдарын келтіруге болады. Дегенмен, нәтижелілігі дәлелденген, яғни оң әсерін көрсеткен технологиялар денсаулық сақтаудағы қиын мәселе болып келеді. Себебі оларды қолдану қосымша ресурстарды (тек қаржы жағынан ғана емес) немесе қолда бар (шектелген) қаражатты денсаулық сақтау жүйесінде қайта бөлуді қажет етуі мүмкін. Сондықтан оларды Түркістан облысының тұрғындары да күнделікті өмірге енгізіп, қажетті деңгейде бағалап, тиімді түрде пайдалану керек.
МТБ — жүйелі, ашық, әділетті және тұрақты негізде медициналық технологияларды қолданумен байланысты медициналық, әлеуметтік, экономикалық және этикалық мәселелер жөніндегі ақпаратты жалпылайтын пәнаралақ үдеріс. МТБ науқастардың қажеттіліктерін ескеріп, денсаулық сақтауда қаржыны барынша тиімді қолдануға бағытталған қауіпсіз, нәтижелі саясат құруға септігін тигізеді. Денсаулық сақтау саясатымен тығыз байланыста болуына қарамастан, МТБ зерттеу нәтижелері мен ғылыми әдіске негізделуі тиіс.
Медициналық технологияларды бағалаудың негізгі мақсаты шешім қабылдаушы тұлғаларды денсаулық сақтаудың барлық деңгейінде ресурстарды тиімді бөлу жөніндегі қолжетімді, ғылыми негізі бар ақпаратпен қамтамасыз ету болып есептеледі. Оны технологияның пайда болған күнінен бастап, өзінің заманына сай болмай қалған кезіне дейін үнемі бірге жүріп отыратын үздіксіз үдеріс ретінде қарастыруға болады.
