Түркістан қаласында симуляция орталығы салынады. Бұл туралы Үкімет отырысында ҚР Денсаулық сақтау министрі Алексей Цой айтты, деп хабарлайды ҚазАқпарат.
«Бұл орталықта дәрігерлер біліктілік көтеруден өтіп, нақты клиникалық жағдайларда іс-жүзінде дағды жинайды. Жоғары медициналық технологияларға оқыту түрлі модельдерде, тренажерлер мен виртуалды симуляторларда жүргізу жоспарланған. Бұл медицина қызметкерлерінің кәсіби қызмет барысында процестерді, жағдайларды және өзге де аспектілерді нақты модельдеуге мүмкіндік береді», — деді министр.
Оның атап өтуінше, Түркістан қаласында халыққа амбулаторлық стоматологиялық көмек көрсететін емхана жоқ. Сондықтан бір ауысымда 300 келушіні қабылдайтын тіс емханасын салу жоспарланған. Бүгінде жобалық-сметалық құжаттары әзірленіп жатыр.
«Түркістан қаласында 25 бригадаға арналған жедел медициналық көмек стансасы салынады. Бүгінде құрылысы жүргізіліп жатыр. Түркістан облысы әкімдігінің ақпаратына сәйкес H.H.Sheikh Mohamed Bin Zayed Al Nahyan қоры Ана мен бала орталығын салуды жоспарлап отыр», — деді Алексей Цой.
