Түркістан облысы Мақтаарал ауданындағы су басқан Өргебас ауылын қалпына келтіру жұмыстары қарқынды жүріп жатыр. Бүгінгі таңда елдімекендегі 195 үйдің 193-і 17 миллион теңге өтемақыны алу үшін келісімшартқа тұрған.
Келісімшарт бойынша 193 үйдің барлығына І транш бойынша 17 миллион теңгенің 50 пайызы аударылып, тұрғындар үйлерінің құрылысын жүргізуде. Сондай-ақ, 7 тұрғын үйге ІІ транш бойынша тағы 25 пайыз қаржы аударылып, аталған үйлерге ішкі әрлеу жұмыстары жүргізілуде.
Қазіргі таңда 188 үйдің іргетасы қаланып, 105 үйдің қабырғасы өріліп біткен. Сонымен қатар, ауылда 43 үйдің шатыры жабылса, 190 баспана толық бұзылған.
Жалпы қазіргі таңда елдімекенде 694 құрылысшы 60 ұжымға бірігіп, құрылыс жұмыстарын жүргізіп жатыр. Бұған дейін Өзбекстан Республикасы тарапынан өргебастықтарға 3 экскаватор, 1 камаз бен 30 адам қызмет көрсеткенін де айта кеткен жөн.
Айта кетейік, Өргебас ауылы 1971 жылы құрылған. Елді мекеннің жер көлемі 1256 гектарды, оның ішінде егістік жердің көлемі 1203 гектарды құрайды. Бүгінде мұнда 1451 тұрғын тұрады.
Ауылда 1 мектеп, 2 балабақша, 1 медицина пункті мен 1 полиция пункті бар. Сонымен қатар, 155 шаруа қожалығы, 1 мал бордақылау алаңы, 3 сауда нүктесі мен 1 жауапкершілігі шектеулі серіктестік жұмыс істейді.
Түркістан облыстық өңірлік коммуникациялар қызметі
