Республикалық хореографиялық «Ақ шағала» фестиваліне қатысқан жетісайлық оқушылар жүлдегер атанып, І орынды иеленді деп хабарлайды qaraqalamnews.com ақпарат агенттігі.
Еліміздегі би өнерінің мәртебесін көтеріп, талай талантты оқушылардың томағасын сыпырып үлкен сахнаға алып келген Республикалық хореографиялық «Ақ шағала» фестивалі де өз мәресіне жетті. Оқушылардың хореографиялық дамуына үлес қосып, шығармашылық мүмкіндіктерін дамытуға, оқушылардың бойына мәдени құндылықтарды сіңіре отырып би өнеріне деген қызығушылықтарын арттыруға бағытталған аталмыш фестиваль республикалық деңгейде өткізілетін айтулы шаралардың бірі саналады.
Ел аймақтарынан келген 153 оқушының ішінде өзгелерден оқ бойы озық шығып, киім үлгісімен, хореографиялық қимылдарының бірдейлігімен ерекше көзге түсіп, әділ қазылардың ыстық ықыласына бөленген Жетісай ауданы, №20 «Т.Рысқұлов» атындағы жалпы орта мектебінің «Шаттық» би тобы жеңіске жетті. Байқауда Жетісайлық бүлдіршіндер «Кесе» және «Кадриль» билерін сахналап, жүлделі I орынға ие болды.
«Бұл біздің қол жеткізген алғашқы жеңісіміз емес. Бұған дейін де талай байқауларға қатысып, мектебіміздің, аудан, облысымыздың намысын қорғағанбыз. Біз жеткен жетістіктерімізге масайрап тоқтап қалмаймыз. Алда әлі бағындырар белестеріміз көп. Осы мақсатта тынымсыз еңбек пен ізденіс үстіндеміз» дейді би ұжымының жетекшісі Кенжехан Сапархалұлы.
