КӘСІПКЕРЛЕРДІҢ ҚҰҚЫҚТАРЫ ҚОРҒАЛДЫ

Жетісай ауданының прокуроры Нұрғали Асқанбековтың бастамасымен өткен тұрғындармен кездесу барысында шаруалар тарапынан жыл сайын мақта өніміне берілетін субсидияны алу кезінде проблемалар туындайтыны айтылып, оның оңды шешілуіне ықпал ету туралы өтініш жасалған болатын.
Аталмыш мәселелерге байланысты жүргізілген зерделеу жұмыстары кезінде шаруалар мақтаны трейдерлерге өткізілгені анықталды. Ал, ҚР АШМ-нің 27.02.2015ж. №4-3/177 бұйрығымен бекітілген Қағиданың талаптарына сәйкес шаруалар субсидия алу үшін мақта өнімін мақта өңдеу зауытына тапсырып, электрондық шот-фактура алуы тиіс.
Бұдан бөлек, «qoldau.kz» порталындағы «subsidies» база жүйесі субсидиялау туралы өтінімдерін қабылдамаған.
Қағида талаптары бойынша субсидиялау туралы өтінім шаруа қожалықтың атынан берілуі тиіс. Ал, іс жүзінде субсидиялау туралы өтінім шаруа қожалық төрағасының, яғни, жеке тұлғаның атынан берілген.
Аталмыш мәселелерге байланысты «qoldau.kz» порталын жетілдіру, Қағидаға өзгерістер мен толықтырулар енгізу үшін Түркістан облысы ауыл шаруашылығы басқармасына ұсыну енгізілді (27.09.2019ж. №2-12-19-02882).
Осы ұсынудың негізінде шаруалардың мәселесі облыстық және республикалық деңгейде қаралып, ҚР АШМ-нің 27.02.2015ж. №4-3/177 бұйрығына өзгерістер мен толықтырулар енгізілді, кәсіпкерлер субсидия алуға қол жеткізді.
Атқарылған жұмыстардың нәтижесінде мақта өнімінің 557 731 982 теңге субсидиясын ала алмай жүрген 2 274 кәсіпкерлік субъектінің өтінімі қанағаттандырылып, олардың құқықтары қорғалды.