Түркістан облысы, Кентау қаласында орталық жылу жүйесіне қосылған нысандар көбейгендіктен көпқабатты тұрғын үйлердің жылу сапасы нашарлаған. Бұл туралы жылу орталығының басшысы Асхат Абдрасилов мәлімдеді.
Асхат Абдрасиловтың сөзінше, енді сол нысандардың ең ірі дегендері шетінен жылудан ажыратылады. «Коммерциялық нысандардың иелеріне алдымен ескерту жіберіледі. Жиналыс өткізіп, түсіндірме жұмыстарын жүргіземіз. Тойханалар мен базарлар орталық жылу жүйесінен ажыратылады. Содан кейін бір апта көлемінде жұмыстарды атқаратын боламыз»,– дейді Кентаудағы жылу орталығының басшысы.
Қазір орталыққа шаһардағы Рысқұлов, Уәлиханов, Әл-Фараби көшелеріндегі көпқабатты үйлердің тұрғындарынан шағым түскен. Себебі бұл үйлердің жылу жүйелері қосымша насосты қажет етеді. Енді сол құрылғыны орнату жұмысы қолға алынбақ. Қалған коммерциялық нысандарды жылу жүйесінен ажырату келесі жылу маусымына дейін жүзеге асырылмақ. Өйткені орталықтың күші барлығын қамтуға жеткіліксіз. Айта кетейік, жалпы қалада 348 көпқабаты үй, 2500-ден аса жеке сектордағы үй, 441 коммерциялық нысан, 112 бюджеттік мекеме жылу орталығына қосылған. Жалпы абонент саны 11738-ді құрап отыр
