Мектеп жанындағы Алаш арысы Ахмет Байтұрсынұлының мүсінінің айналасы өңірдегі «ақжолдық» депутаттардың демеушілігімен қайта жаңартылды.
Бүгінгі шара барысында «Ақ жол» партиясының төрағасы Азат Перуашев, партия төрағасының орынбасары Қазыбек Иса ұлт ұстазы Ахмет Байтұрсынұлының ескерткішіне гүл шоғын қойып, тал екті.
Жиынға жиналғандар мектеп ішінде ақынның атына ашылған электронды кітапханасымен де танысып шықты. Сонымен бірге, халық қалаулылары естелік қолтаңба қалдырып, мектептің жұмысына оң бағасын берді.
– Алаш қайраткерлерінің еңбегі әсіресе жас буынға үлкен өнеге болсын. Келешек ұрпақ біздің бейбіт күндерімізді, Тәуелсіздігімді қадірлеп жүре берсін, – деді Азат Перуашев.
Жиын соңында депутаттар 50 оқушыға мектеп формасы үлестірді.
– Бұл алаңшаның ашылғаны мектеп оқушылары үшін жақсы болды. Біздер күн жылынса, барлық іс-шараларды осы аллеяда өткіземіз. Өйткені, Алаш арысы Ахмет Байтұрсыновты кейінгі ұрпаққа айту, шығармашылығын насихаттау біздің басты міндетіміз, – дейді мектеп директоры Гүлмира Саурбаева.
Аталған мектеп 1974 жылы 624 оқушыға салынған. Білім ошағы ашылғанда 2000 оқушы қазақ, орыс сыныптарында білім алған болса, қазір тек қазақ тілді 900 оқушы білім нәрімен сусындауда. Сондай-ақ, мектепте 84 мұғалім жұмыс істейді. 50 жылға жуық тарихы бар мектептің бұрынғы атауы А.С. Пушкин болған екен.
