Мәжіліс депутаты Серік Ерубаев іс-сапармен Түркістан қаласына барды. Рухани шаһарда филиал мүшелерімен кездесіп, іс-сапарының негізгі мақсаттарымен таныстырды.
«Алғашқы іс-сапарды Маңғыстау өңірінен бастадым. Одан кейін Атырау аймағында болдым. Екі өңірде де өзекті мәселер көп екен. Енді міне, сіздердің де мәселелеріңізді тыңдауға келдім. Шешімін таппаған проблемаларыңыз болса, айтыңыздар. Осы сапар барысында айтылған мәселелерді билікке жеткізуге, сонымен қатар, Парламент мінберінде көтеруге атсалысамыз»,- деді халық қалаулысы.
Серік Ерубаев облыс аумағындағы алыс аудан-қала депутаттарымен зум арқылы да байланысқа шықты. Өңірдегі шешімін таппаған мәселер бойынша да пікір алмасты.
Жиында Кентаудағы 60 пәтер газбен, жылу берілмегендігі айтылды. Сонымен қатар, төлебилік депутат кәріз жүйесін тарту, электр қуатын жеткізу және субсидия мәселелерін ортаға салды.
Бұдан кейін, этномәдени орталықтарының өкілдерімен кездесті. Осылайша, халық қалаулысы іс-сапарын Маңғыстаудан бастап, Атырауды аралап, түркі елдерінің рухани астанасы Түркістан қаласымен аяқтады.
