ҚР Индустрия және инфрақұрылымдық даму министрлігінің ұйымдастыруымен «Қазақстан Инжиниринг» АҚ жасаған 10 ИВЛ аппараты республикада алғашқылардың бірі болып Түркістан облысы, Мақтаарал ауданының «Мырзакент» ауруханасына жеткізілді.
Ақмола облысы Көкшетау қаласында өндірілген отандық өнім – жасанды тыныс алу аппараттарын Мақтаарал ауданының «Мырзакент» және «Атакент» аудандық ауруханаларына табыстаған «Мырзакент» мақта зауыты мен Шымкент қаласындағы «Азала текстиль» фабрикасына иелік ететін компанияның басқарушы директоры Берік Қыдыралиев.
Іс-шара барысында аудан әкімінің орынбасары Сәкен Сұлтанханов аппараттарды жеткізуге атсалысқан барша азамттарға алғысын білдіріп, ауданда жасанды тыныс алу аппараттарының санының өсуіне және дәрі-дәрмектердің жеткілікті болуына байланысты пневмониямен ауыратындардың саны тұрақтап жатқанын айтты.
«ИВЛ аппараттарын алғашқылардың бірі болып Мақтааралға бағыттағаны үшін ҚР Индустрия және инфрақұрылымдық даму министрі Бейбіт Атамқұлов пен облыс әкімі Өмірзақ Шөкеевке аудан жұртшылығының атынан алғыс білдіреміз. Сондай-ақ, аппараттарды жеткізіп берген «Азала груп» компаниясының басшылығына рахметімізді айтамыз» дейді Сәкен Сұлтанханов.
Аудандағы қайырымдылық шараларынан шет қалмайтын «Азала груп» компаниясыбұған дейін де індетке байланысты медициналық бетперделер мен дезинфекциялық құралдарды тегін таратқан болатын.
Бауыржан НАЙМАНОВ
