Биылғы жылғы «Мұғалімдер күні» мерекесі елдегі карантиндік шектеулерге байланысты қашықтықтан ұйымдастырылса да жүректерге қуаныш сыйлайтын көңілді нотада өтті. Әлеуметтік желілердегі жүрекжарды құттықтаулар, шәкірттер мен мектеп түлектерінің ұстаздарына жолдаған ақ тілектері, риясыз ризашылықтары ұстаздар қауымын тебіреніске толы үлкен қуанышқа бөледі.
Осындай мейірім мен махаббатқа толы мерекеде Жетісай қаласындағы №9 «Д.Қонаев» атындағы ІТ лицейінің биология пәнінің мұғалімі Жәудір Молдабекова Түркістан облысының әкімі Өмірзақ Шөкеевтің қатысуымен өткен мерекелік шарада «Облысқа сіңірген еңбегі үшін» медалімен марапатталса, Асықата кентіндегі «Қайнар» мектеп-гимназиясының қазақ тілі мен әдебиеті пәнінің мұғалімі Рашит Исмаилов облыс әкімінің «Үздік сынып жетекшісі – 2020» арнайы дипломымен, 100 мың теңге қаржылай сыйлығымен марапатталды.
Айта кетейік, бұған дейін де бірнеше байқаулардың жеңімпазы болған Рашит Исмаилов ауданда да «Үздік сынып жетекшісі» атанған.
Тек шәкірт тәрбиелеп қана қоймай қолы босай қалса жаңашылдық пен ізденіс үстінде жүретін ұстаздар қауымын айтулы марапаттарымен құттықтаймыз!
