Студенттік өзін-өзі басқару – студенттердің оқуын, тұрмысын басты назарға алып, бос уақыттарын тиімді ұйымдастыруға, олардың қоғамдық белсенділігін арттыруға, оқу орыны қабырғасында студенттік бастамаларын қолдауға қатысты өзекті сұрақтарды шешу бойынша бастамашыл, өзіндік, қоғамдық қызметінің ерекше үлгісі саналады. Өзін-өзі басқару жүйесіне тартылатын студенттер жан-жақты білімді, ізденімпаз, жаңашыл болуы үлкен маңызға ие.
Жуырда Мақтаарал аудандық мәслихатының депутаты, аудандық «Жастар ресурстық орталығы» КММ басшысы Сүндет Кенжебаев Мақтаарал аграрлық колледжінде міне осындай бастамашыл студенттермен кездесу өткізді.
Кездесуде жас депутат колледждің белсенді жастарымен ашық сұхбат құрып, мамандықтары туралы пікірлерін тыңдап, болашақтағы жоспарларына қанықты. Колледжішілік өзін-өзі басқару ұйымының студенттердің әлеуметтік-маңызды бастамаларын іске асыру, білім беру үдерісін басқаруға қатысуды жүзеге асыра отырып студенттердің сапалы білім алуларындағы тиімді мәселелерді шешу бағытындағы жұмыстарының барысымен танысты. Нәтижелі жұмыс істеп келе жатқан ұйым жетекшілерінің үйлестірушілік қабілеттеріне жоғары бағасын берді.
Өйткені, түрлі салалармен терең жұмыс жасау арқылы және студенттерді дұрыс үйлестірудің арқасында оқу орнындағы оқытушылардың білім, білік, дағдылар жиынтығын қалыптастыруда, студенттердің өзін-өзі жетілдіруі мен өзін-өзі тәрбиелеуде атқарып жатқан жұмыстары жемісті болмақ.
Жиын барысында өмірдегі өз орнын анықтай алатын сапалы біліміне сүйеніп, өз мүмкіндіктерін жүзеге асыратын, үнемі даму үстінде жүретін, өз-өзін өмір бойы оқуға бағыттап отыратын колледж студенттерімен психологиялық тренинг өткізіліп, түрлі тақырыптардағы білімдері сынға түсті. Еркін форматта қойылған сұрақтарға жауаптар беріліп, ұсыныстары тыңдалды.
